1 John 1
A Nita Mahuri i Bele Kavakava
1 aA Nita Mahuri i made hosi, muga na maka maki ni ratarike. Mi longoa a nitana, mi masia na matane mia. I muholi mi masia, mi padoi ia na limane mia. 2 bA Nimahuri iea i bele kavakava, mi masia. Mi vakalongo mua vona a Nimahuri Vakaroro iea, ra i made muga turana e Tamana, muri i bele kavakava ne mia. 3A maki lobo mi matai, a maki lobo mi longo, ngane mi taki tala ne mua, lakea mua ranga mu gu rihi mia. I muholi, si rihi e Tamana turana e Tuna, re Isu Kristo. 4 cA herea a raukea iea, a nivivi ne mia ge bele dagi.Si Gi Laho na Nipara na Vure
5 dA ngava mi longo vona, ngane mi vakalongo mua vona i maea: A Vure a Nipara. I uka ranga hini ge uvo ge tabuli vona. 6 eE rei a viri i taki ta i rihi a Vure, pali i laho na uvo, i uka ma i ta muholi. Ia a bakovi na taminga. 7A Vure i made na hini palala. I mavonga, na tahuna si laho na hini palala, si varihi, a darane Tuna, e Isu, i vahilolo hita na naro hale lobo ne hita. 8 fPali a viri i taki ta i uka naro hale, i uka ma i ta muholi. I tami mulea. 9Pali na tahuna si taki tala na Vure a naro hale ne hita, a Vure bara i ramai a ngava muholi i taki pali, bara i ramai a naro kiripiripi vona, i puga vuroki a naro hale ne hita, i vahilolo hita, si malamala na matana. 10Pali a viri i taki ta i uka naro hale ge rata, ngane i takia a Vure, ta ia a bakovi na taminga. A bakovi maea i marikoi a nitana Vure.
Copyright information for
BNP